Mark 2

1Anyipyei mwa begye navun, wa, jezeɓe Kapanahum, nabari Owo ɓe-ɓenya kwa gnami n zhi wolo-wolo. 2Puwa n wo ɓei dnanyi, nu n na zayi har to ai bwa aba na boknumi gbem. Wa zhin ɓa waʼazi. 3Aza n gun anyi ɓa ɓe n zayi shi n nayi-fi-fiyi-ya n nyasan yi. 4To ɓa bwa aba n ɓasi Yesu a bam, ɓa bma nyakunshe ɓa shin nyasan-yi shi n Yesu abye.

5Sa n Yesu ɓei gye ɓa gaiciyaga, Wa ci nyasan-yi ge, “Aku ha laifi zhin gafara.”

6– 7Ama A Yahudawayi adini tukwoda ɓa dafi a ɓa mi, “Deye kwonu zhin (tukwo-mwa). Wo zhin nubo ge Wo zhin Shekwoyi nu? Gama Shekwoyi gmanyi Wonu zhin gafara zhinyi.”

8– 9Yesu ɓei kpe ɓa bugba ye, Wa ci ɓa ge, “Knihi nu zhin cei wo fya? Kni dei nu dulo n fwa-fwa a ci ge a ku gafara zhin wo, ko a la wo kagna? 10– 11Ma wu fye ge Emi; ʼZa Nugun n ikoyi lo Ma zhin wo gafara, Wa pmi wye da nyasan-yi Wa ciwo ge, a la ho kagna. Ku ha pece ha lo ho puwa!”

12Wa gya gna gun she wa ku wo pece wa gmiya lo bmi. Ca wo aza mwa ɓai la Shekwoyi tu, “Yi to shin degye pya gyem.”

13Yesu wa je gmi ya lo Ola gbe, Wa zhan za waʼazi nɓa ɓei shekna Wo nyi. 14She wo ɓei zan-zan Woi v i la gbe, Wa gye Levi Alfas nugun n sase tu nwo agadu gwo ba. Yesu wa ciwo ge, “Knuɓe Miyi, ɓe ha ze Mi bara.” Levi wa laka sa wa kun lo woi!

15Nsukwoyi Levi wa yi wo agadu gwoyi aje n na laifida a dnagmai yi n na nyagyi gyi ba, n na bayi ɓa sun n Yesu yi, n Wo abarayi. (A laifida ye pya ɓei mwa begye n na za nɓa ɓei viwo nyi.) 16Ama sa na Yahudawayi adini tukwoda ɓei gye Yesu woi gyi nyagyi n na laifi dayi, ɓa ci Wo abara ge, “Knihi nu zhin Woi mi Woi gyi nyagyi n na laifida yia?”

17Sa n Yesu ɓei wo ɓa ɓeda Wa ciɓa ge, “Anyasan-yi nu n shigbeda apma yi, toge alafiya dam. Mi to ɓe Ma gna a za manayi nu ge ɓa ye abui m, sai aza nukoyi.”

Oza Nwa Gmi Nshe

18Saho lo n Yohanna a bara n na Yahudawayi atukwodayi ɓei zhin azumi. Wato to ɓai gyi nyagyim, shi ɓa adini ɓei wu ɓa. Nwyihoi ɓa ɓe Yesu aba ɓa nyawo, ɓo kwo zhin to Wo abara yi zhin azumin.

19Yesu wa dnaɓa ɓegbe ge, “Mulaɓa anugundo zhin ɓa na nyagyi n muia ɓa zhin? Ɓa ɓa wun bugba woye kunsun n ɓai?” 20Ama n wyihoi a ɓei laɓa mulaɓa nsayi nu nɓa ɓei wun bugba. 21(Azumi shi zhin zokwo kwo-kwoyi fye nu) Kwo ze ngye a gu eje kwo-kwoyi ta n je woi-woyi nu. She paci yi ɓei je saya ma? Obwo woyi kwa du kwokwoyi pata. 22Fye gna ce yekpe lo, nge n na fi anab nuwan woi-woyi n Pwakun kwo-kwoyi, sa anab nuwan ɓei to gunzhi, pwakun ɓei ɓaya anab nuwan a zhangma. Anab nuwan woyi ye pwakun woyi nu.

23Nwyihoi njesun, n Satiwyiyi, Yesu n Wo abara yi ɓai zan-zan fi nfwa, O Wo abara ɓa bma alkama tukwo ɓai gyi.

24Sa na Yahudawayi adini tukwoda ɓei gye lonu, ɓa ci Yesu ge, “Oho abara zun wyidna gna nu, a ta do alkama n Satiwyiyin.”

25– 26Ama Yesu wa ciɓa ge, “Fye to shin wo esa mikun ɓei gun Esu Dawuda nwa nugun-doyi, wa lo Shekwoyi puwa–Abiyata nu ɓei zhin pirist yakwo n sayi–ɓa gyi bredi n na pirist nu ɓei zhin ɓai bwakwo gyim. Degye ɓei zhin laifi nu nkwohin. 27Ama a ɓei zhin Satiwyi ntu za ampanyi ɓo nu toge! Satiwyi na gyi gyiba n zayim. 28Emi, Eza Nugun, n ikoyi lo Ma da nya na za ɓa mi ɓa zhin n Satiwyi yi!”